ວັນທີ 03 ມີນາ 2024 ທ່ານ ວໍລັດສະໝີ ສຸລິປະພັນ ປະທານສະພາທະນາຍຄວາມລາວ ພ້ອມດ້ວຍຄະນະ ໄດ້ຕ້ອນຮັບ ທ່ານ ໂດ້ຫງັອກທິງ ປະທານສະຫະພັນທະນາຍຄວາມ ສສ ຫວຽດນາມ ພ້ອມຄະນະ ທີ່ເດີນທາງມາຢ້ຽມຢາມ ສະພາທະນາຍຄວາມລາວ ແລະ ເຂົ້າຮ່ວມພິທີທົບທວນຄືນ ແລະ ແລກປ່ຽນບົດຮຽນໃນການຈັດຕັ້ງປະຕິບັດບົດບັນທຶກຄວາມເຂົ້າໃຈ.

ໃນໂອກາດນີ້, ທ່ານ ວໍລັດສະໝີ ສຸລິປະພັນ ໄດ້ແຈ້ງໃຫ້ຊາບໂດຍຫຍໍ້ກ່ຽວກັບການຈັດຕັ້ງປະຕິບັດບົດບັນທຶກຄວາມເຂົ້າໃຈ ສະບັບລົງວັນທີ 17 ມີນາ 2023, ລະຫວ່າງ ສະພາທະນາຍຄວາມລາວ ກັບ ສະຫະພັນທະນາຍຄວາມ ສສ ຫວຽດນາມ ແລະ ສະພາບການໃນການຈັດຕັ້ງປະຕິບັດ ເຖິງຂໍ້ສະດວກ ແລະ ຂໍ້ຫຍຸ້ງຍາກ ໃນວຽກງານສະພາທະນາຍຄວາມລາວ. ຈາກນັ້ນ, ທ່ານ ໂດ້ຫງັອກທິງ ປະທານສະຫະພັນທະນາຍຄວາມ ສສ ຫວຽດນາມ ກໍໄດ້ສະແດງຄວາມຊົມເຊີຍ ຕໍ່ການຈັດຕັ້ງປະຕິບັດບົດບັນທຶກດັ່ງກ່າວ ຊຶ່ງເຮັດໃຫ້ ສະພາທະນາຍຄວາມລາວ ແລະ ສະຫະພັນທະນາຍຄວາມ ສສ ຫວຽດນາມ ໄດ້ມີການຮ່ວມມື ແລະ ສາຍພົວພັນມິດຕະພາບອັນແໜ້ນແຟ້ນ, ພ້ອມທັງກ່າວເຖິງການຈັດຕັ້ງປະຕິບັດຂອງສະຫະພັນທະນາຍຄວາມ ສສ ຫວຽດນາມໃນໄລຍະຜ່ານມາ, ທັງນີ້ກໍໄດ້ຖ່າຍຖອດບົດຮຽນ ແລະ ແລກປ່ຽນຄວາມຄິດເຫັນກ່ຽວກັບວຽກງານທະນາຍຄວາມ.