ໃນຕອນບ່າຍ ຂອງວັນທີ 23 ກຸມພາ 2024, ຢູ່ທີ່ຫ້ອງປະຊຸມພະແນກຍຸຕິທຳແຂວງສະຫວັນນະເຂດ ໄດ້ເປີດກອງປະຊຸມທົບທວນບົດບັນທຶກການພົບປະແລກປ່ຽນ ແລະ ຖອດຖອນບົດຮຽນກ່ຽວກັບວິຊາຊີບທະນາຍຄວາມ ລະຫວ່າງ ຫ້ອງການສະພາທະນາຍຄວາມປະຈໍາແຂວງ ສະຫວັນນະເຂດ, ຄຳມ່ວນ, ສາລະວັນ ແລະ ຈຳປາສັກ. ໂດຍການເປັນປະທານຂອງ ທ່ານ ວໍລັດສະໝີ ສຸລິປະພັນ ປະທານສະພາທະນາຍຄວາມລາວ. ມີບັນດາ ຫົວໜ້າຫ້ອງການ ສທຄ ປະຈໍາແຂວງ ແລະ ສະມາຊິກ ເຂົ້າຮ່ວມ ທັງໝົດ 23 ທ່ານ, ຍິງ 3 ທ່ານ.

ໃນກອງປະຊຸມ ທ່ານ ບຸນຖະໜອມ ສີລິປະເສີດ ຫົວໜ້າຫ້ອງການສະພາທະນາຍຄວາມປະຈໍາແຂວງສະຫວັນນະເຂດ ໄດ້ລາຍງານຕໍ່ການຈັດຕັ້ງປະຕິບັດບົດບັນທຶກການພົບປະແລກປ່ຽນ ແລະ ຖອດຖອນບົດຮຽນກ່ຽວກັບວິຊາຊີບທະນາຍຄວາມ ຂອງບັນດາ 04 ແຂວງ ໃນໄລຍະຜ່ານມາ. ພ້ອມກັນນັ້ນ, ຜູ້ເຂົ້າຮ່ວມກອງປະຊຸມຍັງໄດ້ປະກອບຄຳເຫັນ ເພື່ອເປັນການແລກປ່ຽນບົດຮຽນເຊິ່ງກັນແລະກັນ ກ່ຽວກັບການປະຕິບັດວຽກງານທະນາຍຄວາມ ຢ່າງກົງໄປກົງມາໂດຍມີການສົມທຽບດ້ານທິດສະດີໃສ່ກັບພຶດຕິກຳຕົວຈິງ, ພ້ອມທັງຄົ້ນຄວ້າ ກຳນົດທິດທາງແຜນການໃນຕໍ່ໜ້າໃຫ້ມີຄວາມເປັນເອກະພາບ, ຮັດກຸມ ແລະ ບັນລຸຜົນສຳເລັດຕາມທີ່ຄາດໝາຍວາງໄວ້. ນອກນີ້ກອງປະຊຸມຍັງໄດ້ເຫັນດີຮັບເອົາ ຫ້ອງການສະພາທະນາຍຄວາມປະຈໍາແຂວງບໍລິຄຳໄຊ ແລະ ຫ້ອງການສະພາທະນາຍຄວາມປະຈໍາແຂວງ ເຊກອງ ເຂົ້າຮ່ວມໃນບົດບັນທຶກສະບັບນີ້ດ້ວຍ ແລະ ໄດ້ມອບໃຫ້ຫ້ອງການສະພາທະນາຍຄວາມປະຈໍາແຂວງສາລະວັນ ເປັນເຈົ້າພາບໃນການຈັດກອງປະຊຸມ ໃນປີ 2024.