ໃນຕອນເຊົ້າຂອງວັນທີ 23 ກຸມພາ 2024, ຢູ່ທີ່ຫ້ອງປະຊຸມພະແນກຍຸຕິທຳແຂວງສະຫວັນນະເຂດ ຫ້ອງການສະພາທະນາຍຄວາມປະຈໍາແຂວງສະຫວັນນະເຂດ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານ 05 ປີ ຜ່ານມາ ( 2019 – 2023 ) ແລະ ທິດທາງແຜນການຕໍ່ໜ້າ ຂອງຫ້ອງການສະພາທະນາຍຄວາມປະຈໍາແຂວງສະຫວັນນະເຂດ, ໂດຍການເປັນປະທານຮ່ວມຂອງ ທ່ານ ສີສະຫວາດ ເພັງທະລັງສີ ຫົວໜ້າພະແນກຍຸຕິທໍາແຂວງສະຫວັນນະເຂດ, ທ່ານ ວໍລັດສະໝີ ສຸລິປະພັນ, ປະທານສະພາທະນາຍຄວາມລາວ, ທ່ານ ບຸນຖະໜອມ ສີລິປະເສີດ ຫົວໜ້າຫ້ອງການສະພາທະນາຍຄວາມປະຈໍາແຂວງສະຫວັນນະເຂດ. ມີຜູ້ເຂົ້າຮ່ວມຈາກ ສະພາປະຊາຊົນແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ກອງບັນຊາການ ປກສ ແຂວງ, ພະແນກຍຸຕິທໍາແຂວງ, ຫ້ອງການສະພາທະນາຍປະຈໍາແຂວງ ສະຫວັນນະເຂດ, ຄຳມ່ວນ, ສາລະວັນ, ຈຳປາສັກ, ເຊກອງ ແລະ ສະມາຊິກສະພາທະນາຍຄວາມ ລວມທັງໝົດ 36 ທ່ານ, ຍິງ 6 ທ່ານ.

ໃນກອງປະຊຸມດັ່ງກ່າວ ທ່ານ ບຸນຖະໜອມ ສີລິປະເສີດ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານງານ 05 ປີ ຜ່ານມາ ( 2019 – 2023 ) ແລະ ທິດທາງແຜນການຕໍ່ໜ້າ ຂອງຫ້ອງການສະພາທະນາຍຄວາມປະຈໍາແຂວງສະຫວັນນະເຂດ. ຈາກນັ້ນ ຜູ້ເຂົ້າຮ່ວມກອງປະຊຸມກໍໄດ້ປະກອບຄຳຄິດຄຳເຫັນຕໍ່ບົດສະຫຼຸບດັ່ງກ່າວ ຢ່າງກົງໄປກົງມາ ເພື່ອຮັບປະກັນຄວາມສອດຄ່ອງກັບຄວາມເປັນຈິງ ເຮັດໃຫ້ການຈັດຕັ້ງປະຕິບັດມີປະສິດທິພາບ ແລະ ປະສິດທິຜົນໃນຕໍ່ໜ້າ. ໂອກາດນີ້ ກອງປະຊຸມຍັງໄດ້ມີພິທີມອບໃບຍ້ອງຍໍໃຫ້ໃຫ້ທະນາຍຄວາມຜູ້ທີ່ມີຜົນງານດີເດັ່ນອີກດ້ວຍ.