ໃນວັນທີ 19 ສິງຫາ 2024 ສະພາທະນາຍຄວາມລາວ ໄດ້ຈັດພິທີຮັບ ສະມາຊິກສະພາທະນາຍຄວາມ ໃໝ່ ແລະ ທະນາຍຄວາມຝຶກຫັດ ທີ່ສະຖາບັນຍຸຕິທໍາແຫ່ງຊາດ ໂດຍການເປັນປະທານຮ່ວມຂອງ ທ່ານ ປອ ຈອມຄຳ ບຸບຜາລີວັນ ຫົວໜ້າກົມຄຸ້ມຄອງ ແລະ ສົ່ງເສີມວຽກງານຍຸຕິທໍາ ແລະ ທ່ານ ວໍລັດສະໝີ ສຸລິປະພັນ ປະທານສະພາທະນາຍຄວາມລາວ ໂດຍມີບັນດາທ່ານຄະນະບໍລິຫານງານ, ຄະນະກວດກາ ແລະ ສະມາຊິກ ສທຄ ພ້ອມທັງແຂກທີ່ຖືກເຊີນເຂົ້າຮ່ວມ.

ໃນພິທີ ທ່ານ ສາຍສະໝອນ ສີອຸດົມພັນ ຄະນະປະຈໍາສະພາທະນາຍຄວາມ ໄດ້ຜ່ານຂໍ້ຕົກລົງຂອງປະທານສະພາທະນາຍຄວາມວ່າດ້ວຍການຮັບເປັນສະມາຊິກສະພາທະນາຍຄວາມ ຈຳນວນ 32 ທ່ານ, ຍິງ 8 ທ່ານ ແລະ ຂໍ້ຕົກລົງຂອງປະທານສະພາທະນາຍຄວາມວ່າດ້ວຍການຮັບເອົາທະນາຍຄວາມຝຶກຫັດ ຈຳນວນ 42 ທ່ານ, ຍິງ 21 ທ່ານ. ໃນພິທີດັ່ງກ່າວ ໄດ້ມີການມອບ-ຮັບໃບແຕ່ງຕັ້ງເປັນທະນາຍຄວາມ ໂດຍທ່ານ ປອ ຈອມຄຳ ບຸບຜາລີວັນ ຫົວໜ້າກົມຄຸ້ມຄອງ ແລະ ສົ່ງເສີມວຽກງານຍຸຕິທໍາ ຕາງໜ້າໃຫ້ກະຊວງຍຸຕິທຳ ມອບໃບແຕ່ງຕັ້ງດັ່ງກ່າວ. ໃນຕອນທ້າຍ, ທ່ານ ວໍລັດສະໝີ ສຸລິປະພັນ ໄດ້ໃຫ້ຄຳໂອລົມ ແລະ ໃຫ້ທິດທາງໃນການປະກອບອາຊີບທະນາຍຄວາມແກ່ທະນາຍຄວາມໃໝ່ ແລະ ແຜນການຝຶກຫັດແກ່ທະນາຍຄວາມຝຶກຫັດ.