ໃນວັນທີ 17 ພຶດສະພາ 2024, ສະພາທະນາຍຄວາມລາວ ໄດ້ຈັດການແຂ່ງຂັນກິລາ ເປຕັງ ເພື່ອສ້າງຄວາມສາມະຄີພາຍໃນສະມາຊິກສະພາທະນາຍຄວາມ. ການແຂ່ງຂັນໄດ້ແບ່ງອອກເປັນສອງປະເພດ, ປະເພດຊາວໜຸ່ມ ແລະ ປະເພດອາວຸໂສ. ໃນການແຂ່ງຂັນໄດ້ມີທີມຈາກຫ້ອງການໜ່ວຍສະພາທະນາຍຄວາມປະຈຳເມືອງ 9 ຕົວເມືອງໃນນະຄອນຫລວງວຽງຈັນ, ຄະນະບໍລິຫານງານສະພາທະນາຍຄວາມ, ຄະນະທີ່ປຶກສາສະພາທະນາຍຄວາມ, ພ້ອມກັນນີ້ ຍັງໄດ້ເຊື້ອເຊີນທີມກິລາຈາກ ກຳມາທິການຍຸຕິທຳ ຂອງສະພາແຫ່ງຊາດ, ກຳມາທິການກົດໝາຍ ຂອງສະພາແຫ່ງຊາດ, ສະຖາບັນຍຸຕິທຳແຫ່ງຊາດ, ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ, ສານປະຊາຊົນສູງສຸດ, ສານປະຊາຊົນນະຄອນຫຼວງ, ອົງການໄອຍະການປະຊາຊົນສູງສຸດ, ພະແນກຍຸຕິທໍານະຄອນຫຼວງ. ຜ່ານການແຂ່ງຂັນແບບເສຍຕົກຮອບ. ປະເພດຊາວໜຸ່ມ ທີມຊະນະເລີດໄດ້ແກ່ທີມຈາກ ໜ່ວຍສະພາທະນາຍຄວາມປະຈໍາເມືອງໄຊທານີ, ຮອງຊະນະເລີດທີມຈາກ ສານປະຊາຊົນນະຄອນຫຼວງ, ອັນດັບສາມທີມຈາກ ອົງການໄອຍະການປະຊາຊົນສູງສຸດ ແລະ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ. ປະເພດອາວຸໂສ ທີມຊະນະເລີດໄດ້ແກ່ ທີມຄະນະທີ່ປຶກສາສະພາທະນາຍຄວາມ, ຮອງຊະນະເລີດທີມ ກຳມາທິການຍຸຕິທຳ ສະພາແຫ່ງຊາດ ແລະ ອັນດັບສາມ ແມ່ນທີມ ກຳມາທິການກົດໝາຍ ສະພາແຫ່ງຊາດ ແລະ ສະຖາບັນຍຸຕິທຳແຫ່ງຊາດ.